ҮЗЕБЕЗ САЙЛАГАН ЯЗМЫШ

Туфан Миңнуллинның “Үзебез сайлаган язмыш” пьесасы үзешчән коллективлар һәм профессиональ театрлар иң еш мөрәҗәгать иткән әсәрләреннән берсе. Драматургның мәктәп темасына мөрәҗәгать итүе очраклы түгел. Мәктәптә бала белем алып кына калмый, шәхес булып та формалаша. Шуңа күрә пьесаның исеме укытучының сайлаган тормыш юлына, һөнәренә генә түгел, гомумән алганда, мәктәпнең бала язмышын билгеләүче урын икәненә ишарәли. Әсәр узган гасырның 1970-1972 елларында языла. Мәктәп, укытучы эшенең үзенчәлекләрен, нечкәлекләрен яхшырак аңлау нияте белән Туфан Миңнуллин бер уку елын Татарстанның Кукмара районы Зур Сәрдек авылы мәктәбендә татар теле һәм әдәбияты дәресләрен укытуга багышлый. Пьеса язылып бетүгә Күчмә театрның (хәзерге – К.Тинчурин исемендәге Татар дәүләт драма һәм комедия театры) баш режиссеры Равил Тумашев аны сәхнәгә кую эшенә тотына. 1973 елда сәхнәләштерелгән спектакль тамашачы һәм театр белгечләре тарафыннан бик җылы кабул ителә, озак еллар уйналып килә. 1974 елда автор әлеге “Үзебез сайлаган язмыш” һәм “Нигез ташлары” пьесалары өчен яшьләрнең Муса Җәлил исемендәге республика премиясе белән бүләкләнә.… Күбрәк укырга